A Ulloa é un territorio de pronta ocupación poboacional. Froito dos asentamentos prehistóricos son os distintos vestixios arqueolóxicos que se foron espallando polos diferentes espazos da Ulloa. Foi precisa a tarefa dunha persoa sensible coa arte e a historia para buscar e recopilar, recoller de entre os cascallos e as entulleiras, tamén entre as casas labregas e anticuarios, importantes pezas que aportan información sobre o noso pasado.

O Centro de Interpretación “Monterroso, a vila das feiras” é a consecuencia dun traballo incesante ao longo de moitas décadas da man de don Carlos Méndez Vázquez. Nos anos 90 ábrense en Monterroso unhas salas de propiedade particular nas que se exhibían a colección que hoxe, despois de máis de seis anos de conversas entre os equipos de goberno e o párroco, fican como un ben propiedade do Concello de Monterroso para o desfrute xeral.

Hai dúas partes diferenciadas neste centro de interpretación, como son a Historia da Ulloa e como esta se viu afectada pola Feira de Monterroso.